Агар на соғари лаълат ба ком хоҳад шуд,
Агар на соғари лаълат ба ком хоҳад шуд,
Зи дида хӯрдани хунам мудом хоҳад шуд.
Чунин, ки лоғару зард аст з-абрӯят маҳи нав,
Чу як-ду ҳафта барояд, тамом хоҳад шуд.
Сутуни тири худ аз хонаи дилам чу кашӣ,
Хаёли қадди ту қоиммақом хоҳад шуд.
Чу доя бар лабат ангушт зад, башорат дод:
Ки хушиборату ширинкалом хоҳад шуд.
Ҳаме намуд зи қаддат, ҳанӯз нозада гом:
Ки ҳамчу кабки дарӣ хушхиром хоҳад шуд.
Ғизолвор рамидӣ зи ман, намедонам,
Ки табъи саркаши ту бо кӣ ром хоҳад шуд?
Вуҷуди хокии Ҷомӣ зи шавқи маҷлиси ту
Пас аз вафо-т суроҳиву ҷом хоҳад шуд.