Ҷаҳоне тоза шуд аз файзи ту, эй абри наврӯзӣ,

Ҷаҳоне тоза шуд аз файзи ту, эй абри наврӯзӣ, Мани лабташнаро то чанд баҳри қатрае сӯзӣ?! Сияҳ шуд рӯзи ман з-ин ғам, ки гирам зулфи шабрангат, Намедонам, ки ин давлат каям хоҳад шудан рӯзӣ. Зи тоби хашм рух афрӯхтӣ в-оташ задӣ дар ман, Маозаллоҳ агар бори дигар ин оташ афрӯзӣ. Зи чашмат дилбарӣ омӯхтӣ, дил аз ҳама бурдӣ, Чӣ бошад, к-аз лаби ҷонбахши худ дилдорӣ омӯзӣ. Сулаймонӣ ба мулки дилбарӣ, хотам лаби лаълат, Мабодо девро бар хотами лаъли ту фирӯзӣ. Машав оҳуи доми ҳар кас он беҳ к-андарин саҳро Каманди ҳиммат андозиву сайди иззат андузӣ. Зи чоки ҷайби ҷон, Ҷомӣ, кунӣ гум нақди умр охир, Бар он чок арна аз домони васлаш васлае дузӣ.